深水埗Romanne Leisure Food Concept
已更新：2月19日
今次我去左深水埗試左呢間Romanne Leisure Food Concept，呢度好似深水埗的綠洲。
➥🔆 訂閱頻道－ https://www.youtube.com/c/窮遊達人MrTravelGenius?sub_confirmation=1
其實佢都幾近深水埗警署果頭，不過 就比較近大角嘴方向，所以有少少旺中帶靜，但係咁樣仲好，唔好會多人，唔會好嘈，幾正，有少少綠洲感覺，因為佢裡面真係幾綠油油。
我係午餐時間去做野，路過所以試下，佢有個lunch menu真係好抵食，大家可以睇睇個餐牌先~
我同朋友就叫左一人一個lunch，佢每份午餐都包括前菜/餐湯＋主菜＋飲品，每個主菜價錢都唔一樣，HK$64起，感覺上都唔算好貴，想食好少少，價位大概就80元左右。
我叫左軟殼蟹牛油果蕃茄醬意大利飯，飲品方面我就揀左薰衣草牛奶
我朋友就叫左個柚子胡椒脆炸雞漢堡配香料薯條，飲品方面朋友揀左朱古力榛子奶昔。
佢餐前可以揀蕃茄湯或者沙律，我地每人叫左一款黎試。 沙律唔係馬虎用廉價生菜，真係用沙律菜製作，仲加左芝麻沙律汁，好開胃呀~
朋友叫的甘荀湯，佢話好濃甘荀味好香，仲有少少香草味，好有驚喜，開頭以為係d罐頭湯，但飲落有新鮮甘荀感覺，高質wo
軟殼蟹牛油果蕃茄醬意大利飯 HK$88
佢係一個小型脆炸軟殼蟹，真係好開心，仲有半個牛油果嘅份量，真係唔簡單！
蕃茄汁底燴飯酸酸甜甜，撈埋牛油果黎食嘅口感真係好RICH，再加埋軟殼蟹就更香口，真心係好好食，正！
講下跟餐飲品，呢個係特飲薰衣草味牛奶要加HK$12
薰衣草味牛奶我都係第一次飲，好香好純樸，好好飲呀，不過我配牛油果飯就唔係太夾，因為兩樣都好黏口，牛油果飯建議配返d酸酸地飲品好D
柚子胡椒脆炸雞漢堡配香料薯條 HK$93
呢個真係大力推薦，首先佢個麵包有黑糖味，好結實但係又好鬆軟，聽落係咪好怪? 即係佢好厚好RICH，但壓落去又好有彈性，呢個麵包真係好高質！
另外佢炸雞扒都超大塊又厚肉，好老實，真係唔可能夾埋一齊擺入口，太厚啦~~~~~
中間仲夾雜左青瓜絲、蕃茄、沙律菜、沙律醬，朋友話食落好fresh好清新，個麵包係最正！
朱古力榛子奶昔 跟餐+HK$18
朋友呢杯係朱古力榛子奶昔，正路野，好飲，但無驚喜，偏甜，岩哂鍾意甜嘅女仔飲！
大家如果去開深水埗，可以試下呢間高質西式LUNCH呀~~~雖然係深水埗區黎講價錢算高消費，但真係一分錢一分貨，其實佢質素計落真係超值添呀。
📍 Romanne Leisure Food Concept
地址: 深水埗荔枝角道309號地舖
📷 Sony ZV1 @sonyhongkong
📸 cameraman - @mr.travelgenius
📝 窮遊達人 - 官方網站
足本節目 ⏬
Full Version ⏬
Facebook/YouTube 搜尋Search
🔥窮遊達人 Mr. Travel Genius🔥
🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured
🅿️ Facebook - https://www.facebook.com/mr.travelgenius/
📸 Instagram - https://www.instagram.com/mr.travelgenius/